|
1. Introdukshon
Pa sierto okashon trahadó no mester tuma fakansi. Por ehèmpel si e ta bai kasa òf si un famia hopi yegá fayesé. Na e otro banda, dunadó di trabou en prinsipio no mester paga salario pa e tempu ku e trahadó no a ehersé e trabou palabrá (no work, no pay). Trahadó si por hasi un apelashon riba fèrlòf ekstraordinario. Pa esei trahadó mester konsultá ku su dunadó di trabou delantá.
2. Kiko nos ta komprondé bou di fèrlòf ekstraordinario?
Bou di fèrlòf ekstraordinario (tambe fèrlòf speshal òf ousensia kòrtiku) ta komprondé ku trahadó ta haña tempu liber manteniendo derecho riba salario pasobra tin sirkunstansha speshal. E sirkunstanshanan speshal bou di kua e trahadó ta mantené derecho riba su suèldo ta regla den artíkulo 1614c di Kódigo Sivil di Antia Hulandes.
Solamente den un kantidat limitá di kaso lei ta indiká ki por komprondé bou di sirkunstansha speshal. Den un kombenio por eskrito, den un reglamento òf kontrato kolektivo di trabou (CAO) por regla den kua otro sirkunstansha speshal ta duna fèrlòf ekstraordinario i pa kuantu tempu (ora òf dia).
3. Ki ora trahadó tin derecho riba fèrlòf ekstraordinario?
Segun artíkulo 1614c di Kódigo Sivil trahadó tin derecho riba fèrlòf ekstraordinario pa kumpli ku un obligashon legal i komo konsekuensha di sirkunstansha partikular.
Komo sirkunstansha partikular lei ta menshoná:
- parto di kasá di e trahadó
- fayesimentu i entiero di hende di kas òf di famia òf pariente den linea estrecho sin limite (mayornan, wela i tawela, bisawela i bisatawela, yunan, ñetu i bisañetu) i den segundo grado den linea lateral (rumannan, swa i kuña)
- ehersé derecho di vota
- un obligashon imponé den un ordenansa general òf dor di gobièrnu.
E resumen aki no ta limitativo.
Tambe den otro kasonan ku no ta menshoná den lei, dunadó di trabou por duna trahadó fèrlòf ekstraordinario si sirkunstansha ta hustifiká esei segun su opinion.
4. Kuantu tempu fèrlòf ekstraordinario ta dura?
Kódigo Sivil di Antia Hulandes ta stipulá den artíkulo 1614c ku “trahadó ta mantené derecho riba salario pa un tempu relativamente kòrtiku ku ta kalkulá segun rasonabilidat”. Lei ta laga kompletamente na partidonan kon ta definí “un tempu relativamente kòrtiku kalkulá segun rasonabilidat”.
Den un kontrato laboral por eskrito, reglamentu òf kontrato kolektivo di trabou (CAO) por regla den kua kasonan partikular i pa kuantu tempu dunadó di trabou ta obligá di sigui paga salario. Den kaso ku nada ta reglá por eskrito dunadó di trabou i trahadó mester kumbiní durashon di e fèrlòf ekstraordinario.
Relashoná ku elekshonnan pa sea konseho insular òf staten, dunadó di trabou ta obligá di garantisá ku kada trahadó ku ta outorisá pa partisipá na e elekshon ta haña kuater ora di trabou konsekutivo liber ku pago di salario. E regla aki no ta aplikabel si e trahadónan konserní na un otro manera kaba tin kuater ora konsekutivo liber durante e oranan di elekshon (di 08.00 or te 19.00 or).
5. Por sosodé ku no ta paga salario durante fèrlòf ekstraordinario?
Si dunadó di trabou konsedé fèrlòf ekstraordinario e fèrlòf ei ta pagá, a menos ku a ekskluí pagamentu den un kombenio por eskrito òf den un reglamentu.
6. Trahadó por spar fèrlòf ekstraordinario?
No por spar e fèrlòf ekstraordinario. Ta konsedé fèrlòf ekstraordinario riba e dia òf na momentu ku e suseso ekstraordinario tuma luga.
Tambe, dunadó di trabou no tin mag di retené dia di fakansi den kaso di fèrlòf ekstraordinario. E ta konsedé fèrlòf ekstraordinario si òf no. Naturalmente den e delaster kaso trahadó por pidi fakansi (snipperdag). Si trahadó no a sobra dia di fakansi e por pidi fèrlòf sin pago.
7. Kiko ta sosede si trahadó ta òf a bira malu durante su fèrlòf ekstraordinario?
E fèrlòf ekstraordinario ta sigui kana si trahadó ta òf a bira malu durante e fèrlòf ekstraordinario. No por tuma e dia(nan) ei despues.
8. Trahadó tin derecho riba fèrlòf ekstraordinario pa un bishita na dòkter òf dentista?
Lei no a regla nada pa kasonan asina. Tur hende tin ku bishitá dòkter, dentista, terapista, frumu òf poliklinika de bes en kuando. No semper ta posibel pa realisá un bishita asina fuera di oranan di trabou. Den kaso asina trahadó mester di un par di ora liber. Den sièrto empresa esei por riba kosto di empresa (ta duna fèrlòf ekstraordinario pa esei). Trahadó no mester tuma fakansi e ora ei. Dunadó di trabou por ekisigí ku trahadó ta hasi e bishitanan ei mas tantu posibel den su oranan liber.
9. Algun ehèmpel di fèrlòf ekstraordinario a base di kontrato kolektivo di trabou
Algun ehèmpel di fèrlòf ekstraordinario ku ta reglá den kontrato kolektivo di trabou (CAO):
- hubileo di trabou
- matrimonio di trahadó
- dunamentu di man di trahadó
- hubileo matrimonial
- promé santa komunion òf bautismo
- mudansa
- kumpleaño
- kùrmentu pa servisio militar
- malesa grave di mayor, kasá òf yu
- èksamen di skol òf pa un estudio di fishi
- desaster, inundashon òf kandela
10. Konklushon
Lei no ta hopi spesífiko tokante fèrlòf ekstraordinario. Fuera di e kasonan spesifikamente menshoná (mira párafo 3 ariba) i kasonan kaminda esaki ta reglá den un reglamentu òf kontrato kolektivo di trabou (CAO) dunadó di trabou i trahadó por kumbiní den kua kaso mas ta duna fèrlòf ekstraordinario i pa kuantu tempu (ora òf dia).
|
